அதிமுக, எடப்பாடி பழனிசாமியின் எதிர்காலம் என்ன ஆகும்?

தமிழ்நாட்டில் நாடாளுமன்றத் தேர்தல் கருத்துக் கணிப்புகள் அதிமுகவை பொருத்தவரை உண்மையாகியுள்ளன. அந்தக் கட்சிக்கு ஓரிடம்கூடக் கிடைக்கவில்லை.

அதையும் தாண்டி அதிமுகவின் வாக்கு வங்கியில் கடும் சரிவு ஏற்பட்டிருப்பதையும் புள்ளிவிவரம் காட்டுகிறது. அதிமுகவின் வாக்கு வங்கி சரிவும், பாஜகவின் வாக்கு வங்கி உயர்வும் உணர்த்துவது என்ன?

அதிமுகவுக்கு அச்சுறுத்தல் கொடுக்கும் அளவுக்கு பாஜக கூடுதல் வாக்குகளைப் பெற்றுள்ளதா?

நாடாளுமன்றத் தேர்தல் தோல்வியால் அதிமுகவில் எடப்பாடி பழனிசாமியின் தலைமைப் பதவிக்கு நெருக்கடி வருமா? அதிமுவின் எதிர்காலம் என்ன ஆகும்?

7 தொகுதிகளில் டெபாசிட்டை பறிகொடுத்த அதிமுக
ஜெயலலிதா மறைவுக்குப் பின்னர் தேர்தல்களில் தடுமாறி வரும் அதிமுகவின் போக்கு இந்த நாடாளுமன்றத் தேர்தல் முடிவிலும் எதிரொலித்தது. ஜெயலலிதா தலைமையில் கடைசியில் அதிமுக எதிர்கொண்ட நாடாளுமன்றத் தேர்தலில் 37 தொகுதிகள் என்ற வரலாறு காணாத வெற்றியை ருசித்த அதிமுக அடுத்த 10 ஆண்டுகளில் ஒரு தொகுதியைக்கூட வெல்ல முடியாமல் போயுள்ளது.

தமிழ்நாடு மற்றும் புதுச்சேரியில் மொத்தமுள்ள 40 தொகுதிகளில் அதிமுக கூட்டணி ஓரிடத்தில்கூட வெற்றி பெறவில்லை. தென்சென்னை, கன்னியாகுமரி, தேனி, தூத்துக்குடி, திருநெல்வேலி, வேலூர், புதுச்சேரி ஆகிய 7 தொகுதிகளில் அதிமுக டெபாசிட்டையே பறிகொடுத்தது.